ريدان المقدم.. مطولة

والله ومن غير يمين الشعب اليمني معاد يهمه لاشرعية ولا عدوان ولا ام الجن.

يشتي يعيش من جيز اقل الناس اللي عايشه ادنى درجات الحياة الكريمة.

اصحاب معارك النفس الطويل واصحاب الثورة مستمرة، اتخارجوا وخارجوا الناس .

اما يحسمها طرف وينتصر ويفرض حكمه وسلطته واقتصادة وفكرته ومشروعة.

اما معلقة لامطلقة ولامزوجة وتشتو الناس تمشي بعدكم لاين ماجاء.

الطرف اللي مش قادر يحسم يروح يرقد ببيته لايشغلنا طلعنا تبعة فلان نزلنا من نفس التبة. تبتين مقابل تبه وثلاث عماير مقبل عمارتين.

على الاقل يكون مع الناس طرف واحد تقدر تحاسبه على تقصيرة.

لكن كل طرف يرمي بالحجه على الثاني وهم مرتاحين والشعب هو اللي يذوق الامرين.

راتب الحوثي قال هم نقلوا البنك طيب ليش تخليهم ينقلوه ؟ انت حاكم, الناس تشتي منك حل مش تشكي لهم.

الحاجة الوحيدة اللي يقدر عليها الحوثي انه ياخذ من الناس فلوسهم تحت اي مسمى لكن تسلم رواتب لا .
طيب مالرئيس هادي نقل البنك المركزي والضرائب والجمارك والحكومة كلها لعدن ليش مااعترفوا الا بالبنك اللذي يسلم للموظفين رواتبهم ؟

والاصلاح يقول مش عيسلم الا للمناطق المحررة، وكانه المواطن او الموظف شاقي عند ابو الاثنين بلاش.

اذا الناس تقدر تتحرر من الحوثي لوحدها، يعني مابش داعي لحاجة اسمها الشرعية، لانه لو تحررت من الحوثي مثلا، وهذا شيء غير وارد طبعا، سيتحرر ويفرض شرعيته ومش ملزم يقبل بالنموذج الذي صنعه الاخوان في المناطق المحررة.

و الاخوان كالحوثيين بارعين بتوزيع التهم والبكاء والشكوه ورمي اخطاءهم على الاخرين ويألفون هذه الطريقة.

محد وطني الا هم، ومحد صح الا هم، الباقي عندهم حوثة، عفافيش، دنق، عملاء، واذا ماحصلوش مع واحد تهمه يقولوا هذا مايفهمش وبالتالي لايؤخذ برايه اصلا محد يفهم الا هم.

لا وسبحان المسخِر معاهم يسار عجيب، يسار اخواني، يتفانى في خدمة الاخوان مهما كان الامر.

والحوثي معه يسار ايضا بس يسار الحوثي اصبح يعتقد ان الطبيعة هي عبدالملك الحوثي.

فلما نقول ان الحرب مطولة هي فعلا ستطول بطول عمر هاتين الجماعتين.

المهم مطولة فعلا فاستمتعوا

اظهر المزيد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى